كون كان بيديا

عشت في الدنيا   او من مرارها شربت كاس
شرابها سم حيّة   صابني بضر فرّاس

سمها سرح فيّا   خلاّني مغمّض بلا نعاس

المنكر و العين معميّة   حيت كلشي في الدنيا بخلاص

آودّي كون كان بيديّا

نطلّع الماء من لبيار

نطلق سراح لطيار

و نزوّل العزلة علقفار

كون كان بيديّا

نصفّي الغل اللّي في لقلوب

نطفي شعلت لحروب

أو ننصر الضعيف المغلوب

راه الدنيا كذبة مقلوبة

أو ليّام الزّينة دايزة مزروبة

تبغيها الطول تهرب مرهوبة

آربّي رانا تبت قبل هذ التّوبة

كون كان بيديّا

نفك لعكاد

و نزوّل لعناد

و نتبّت لمحبّة بلوتاد

نرد دوك لولاد

اللّي هجرو لبلاد

لاخبز لا زاد

ها اللّي وصل و ها اللّي راجع مجموع فكوم عواد

كون كان بيديّا

نزوّل من لبنات الغيرة

حيث هوما لّبلاد خميرة

معاهم تكثر الدخيرة

راه الموت عليّا دق الباب

لقى قلبي بالهم طاب

قال لي مالك على هذ لعذاب

راه الخالق هو يغيّر المكتاب

عيش ما بقى ليك من سوايع مع لحباب

حيت كلشي عند الله مكتوب في كتاب

كون غير يكون بيديّا

كون صلحت عيوبي

و مسحت ذنوبي