يا اللي ناوي بالمغريب يدور
يا اللي في المغريب او خارج يدور
النصحك تشوف الجديدة او أزمّور
أرض الفلاحة شواطئ و بحور
دكالة أرض الخير و الرجالة
فيها تلقى الراحة
بالملاح تحلى الفساحة
صبحت نجمة من نجوم السيّاحة
راه ما فيها اللي عليك يتعالى
الحلم فيها بلا تفسير
خبزنا خامر ما هو فطير
او خير الأرض شحال كثير
وخى الجفاف عمل فينا حالة
دور في الجردة او شوف لبحاير
الخضرة معاها العين تحير
او ديسيرها كولو طري او شربو عصير
مدينتنا غنية ما محتاجة لدعم الخالة
ملي تكون في الجردة الدور
كول معاك كرموص او باكور
كولو شبعان لتعود مضرور
او تصبح كرشك خاصها غسّالة
واخى الشوماج عامل فينا حالة
و شبابنا خرجت عليه البيطالة
و صبح على مجتمعنا عالة
عندو الحشمة ما فيها بسالة
عندك الأولاد سير للحوزية
سيدي بوزيد أدّي معاك درية
الى بغيتي التّبرانزة شوية
الشمس حارّة او الرملة غزالة
عند المحطّة يتفتحوا ليك لبيوت
لا تقول غنبقى في البرد مشموت
و شكون يدوز عليك يا ضيف و يفوت
الى ما كان يفتح لك بيتو و يضمّك كبالة
في الجديدة لا تقول بالجوع نموت
كول في المدينة لحم او حوت
كلشي موجود عند لخوت
لفلوس ما يخصك منها زبالة
جي او زور حتى السّدات
مولاي بوشعيب الى بغيتي وليدات
او لالة عيشة للسيدات
مولاي عبد الله سيد اللوالة
خرج للبحر في الصباح او دور
السردين مشوي في لفطور
الحوت حاصل في بشاكر و صخور
بجناب لبحر تدّي معاك الرسالة
مدينتنا خرجت فنانة
الرياضة تعلم الرزانة
و الشعبي ديما معانا
سيدي المجدوب حكيم الزجالة
و نتمنى تبقى مدينتنا منورة
او تصبح صنعتنا مطورة
او في الجرائد مشهورة مصورة
او بجهد الله النقصو البيطالة
