مدينة الجديدة قال ليك بغاو يقادو المدينة كل نهار حفير و دقول موضرة ليهم خزينة لهبيش بلا تدبير ولا خطة رزينة مدينتنا كلها مخربة و د قول ضاربها عوينة قدوا لها التوجيهة باش اللي داخل يدوخ و يقول شحال زوينة خاص غير اللي يدور فيها و يعرف بللي ماهي فنينة مدينتنا تبكي بالدموع راهي اليوم صبحت حزينة الضواو شاعلة في كل دخلة و عالبحر باش تزيان القعدة للي بغى يسهر ها اللي يلعب الكورة و ها اللي ينضر ها اللي يدور مع الخليلة في جناب الصخر وها اللي شاد قريعة شراب او في الرملة يسكر او في الليل الغناء الشعبي من العشا حتى للفجر لا امن لاسلطة لا من يغير هد المنكر وزيد خمس معارض كبار ولا واحد فيهم يبهر الزواق في التوجيهة او في العمق ما كاين غير لغدر حالهم حال مدينتنا اللي راهي اليوم كالتحضر لا مجاليس لا رؤساء كل واحد بوحدو يشفر الى بغيتي لجديدة التشوف دخل للاحياء الشعبية راه حالها حال جميع المدون المغربية تم تعرف شحال دالناس صابرين و شحال هازين من كية لا ضواو شاعلين لا طرقان نقية ها لحفاري و ها الضايات الى عندك شي سيارة سير بشوية بشكليطات او موطورات اصحابها في السبيطارات مرمية السربيس في المقاطعات عمالة و كمسارية ابناءنا اليوم تشردات او بالتخدير صبحت مبلية شكون سبابهم في هد الحياة غير الشفرة و الزبونية شحال كثر عندنا د الشوماج واخا عندنا جوج احياء صناعية كل نهار مخططات جداد باش يرجعوها عصرية ها عار ربي الى ما خليوها الدقاد راه مدينتنا بحرية الحوت منوا انواع والربيعة حتى هي أو في الفلاحة دوق الدلاع و القرعة الدكالية تحت الكرمة تلقى الراحة مزينها بركة فالبادية دور في الجردة و كول البيكيرات و كريمصات هندية كولهم شبعان و لا تكثر منهم كرشك تدعيك في العشية مدينتنا مدينة الكرام راه اصالتها عربية الى كدبتي جي و شوف و عنداك تشدك شي جديدية حنانها في البلاد معروف و شوافتها الحسنية جي و زور حتى السادات الى بغيتي تتبرك شي شوية راه الجديدة مقر السادات و الاولية مولاي عبد الله مولاي بوشعيب و للا عيشة البحرية مدينتنا زينة و ولافة راه الجديدة سياحية بيها جوج شواطئ كبار سيدي بوزيد و الحوزية يا الزاير زور الملاح ودخل معاك للساقية و نتمنى من الله تقاد مدينتنا و تصبح حتى هي حضرية هد الكلام غير من غيرتي على بلادي و لا تحسبوا شي كلمة علي راه حتى انا شعبي و نتمنى من الله تتغير هد الوضعية يخدموا الشومورة و النقصوا شوية الميزيرية رحـال اودغــوغ