المخ يا خويا و يا قاطع لبحور جي للمغريب او لحبابك زور راه ما دايم غير الله و قبر محفور لا تخلّي قلبنا عليك مضرور كل نهار غادي جاي في طريقي نفتش عليك في دروب و زناقي و شكون غيرك حبيبي و رفيقي لا تخلّيني في شمس الصيف منشور جميع الناس لي حبابهم يزوروا يشوفوا المدون و معاهم يدوروا على بلادهم او ناسهم يغيروا و انت آش خلاّك معدور بغينا نشوفوا اولادك او لحفاد باركة عليك من لعناد لا تزيدنا حتى انت نكاد خلي قلبك مبشور لا تعيش حياتك ساقط خليك كيف موالف ناشط راه كل من هو في الدنيا هابط عند الله عامل روتور يا خويا دور الموطور في سبانيا ركب البابور و ادخل للمغريب على كازا بور نجيك طاير من الجديدة بحال العصفور ما بغيت منّك لا كاضو ولا هدية بغيتك تكون بي صحة وهنية نضمّك و نعنقك بين ايدية او نفرّش ليك و رود و زهور بغيت نشوفك قبل لا يفوت الفوت و شكون عالم غدّا الدق عليّ الموت او نصبح في قبري مشموت يا خويا طل الله يعمر قلبك بي النور و نتمنى من الله يدق غدّا خويا بابي او نجمع الخوتي و حبابي يزيان كلامي و يزول عدابي او نعمل فرح ما كان في حسابهم مدكور نجمع كبار و صغار او تعمر الزنقة و الدّار او لهدية بي الدقة و النفار فرحي بي الخوتي اللي خلاّوني مسرور حمروا وجهي قدّام الجيران نعمر السينية بي الكيسان نسقي حباب او عديان و يعرفوا باللي ما ني من شجرة مبتور يا ربي تبلّغني مورادي و نعرّف خّوتي بولادي او نجمع شمل بلادي او يتّفسخ الى بينّا شي سحور   رحال أودغوغ