الحراك كنت في بلادي عايش هاني نكتب و نتكلم و نقول الهضرة بالمعاني المنكر و الشر راه في قلبي كواني او عيشت المسكين و الفقر زاد ضناني بغيت ندير لاباس و قررت نهجر اوطاني من طنجة لاسبانيا رانا اليوم صبحت براني ما نعرف نتكلم لا اسباليون لا طلياني و تقادا عليا المصروف و اليوم فين صحابي و خلاني لا خدمة لا ردمة و صبحت ماد يدي لعدياني قلت مع راسي نمشي لباريس ونشوف شي بنية نحكي لها قصة حياتي و لابد تحن عليا  ولاندزوجها وتصاوب لي لوريقات او تصبح عيشتي هنية مشيت و وقفت حدا لاتور اتم غمزتني واحد الشيبانية ضحكت لها و خداتني من يدي و لوات عليا مشيت معها وقلت الحمدو لله هدي غير من رضات والدية قلت لها اكسكيز موا مادام واش حتى انتي برانية قالت لي طي طوا او زادت كرزت على يديا وراها عندها في السنتر دفيل قيسارية وهي تخطط و تقاد و انا ما داري بالقسمية عند بالي غنكون الجزار و انا غير الضحية مشينا للفيلا لابيسين و الجردة اما الصالون ما نقول ليكم اش من ثريا قلت لها مادام جي فاه و عطيني وخى غير شي خبيزة حرفية وكلتني و حتى شبعت او ثم بدات تسول فيا واش عندي لبيرمي واش نعرف نسوق في دولة غربية او بالفرحة قلت لها وي يا مدام انا بين يديك هدية قالت لي تخدم شيفور و هدا ليسي باسي للبوليس و الجدارمية اما الوراق ما تضرب ليهم حساب خليهم عليا خدمت معاها عام و ستة شهور جابت لي فيزا و باسبور ئو قلت مع راسي نخرج بوجهي احمر ندور ما دامت عندي حتى كارت سي جور اما سميتي صبحت جاك ماشي ولد كبور قلبت لوريقات مزيان لقيتهم كلهم غير زور قلت لها غادي نمشي نقطع شي بيي آلي و روتور قالت لي علاش ها السيارة خاص غير اللي يدور المطور الكارافان مشارجي او بالسيارة مجرور تلث ليالي في الطريق او طروا جور دخلت للمغرب في البابور الديوانة حبستني في كازا بور و كلابهم تشمشم في الطونوبيل تنبح و الدور ئويجبدو لي 2كيلو فرينة من تحت المونتسور او تما بدا راسي عليا كيدور ما عرفتها دقيق و لا غير الشيبانية عاملة لي شي سحور باش غير نزور والدية و عندها ندير الروتور لقيت راسي مسلسل من يديا و عند السيطروين مجرور داوني للكوميسارية او تم بداو يخدموا لي في الكونتور انا ما دريت بفعايل الشيبانية و يصحبوني داير مهبول قالوا لي غير قر راه باب الحبس ليك محلول وانا عا حال فمي ماعرفت واش كيضحكوا ولا كيهضروا بالمعقول قول الحق يخفف عليك شوية او في السجن راك مقبول وانا غير ضحية وما عارف اش نقول كتبوا رسالة للداخلية بلي راهم قبطوا على ولد الغول راه هاز 2كيلو كوكايين او هو يصحبو طحين د الفول ئوا قلت مع راسي نهرب قبل لا تطور القضية بان لي الشرجم محلول نقزت طحت من فوق الناموسية انا غير كنحلم ونسحاب راسي غرقوا لي رجلية وبركت نخمم عرقان نتنخصص و الدموع في عينية نسحاب راسي غنتحكم في محكمة جنائية وانا غير مقبوط ضلم وشكون سبابي غير الشيبانية قلت معاها غنخدم باش نحسن هد الوضعية دابا ما بقيت نقدر نرجع تم، بلادي اولى بيا نخدم او ندزوج وشكون يهز هبالي غير هد المغربية يا ربي دزول هد الظلم و تنزل من عندك الهدية التقاد لبلاد و يخدموا لولاد و نقصوا شوية دلميزيرية رحال اودغوغ