حتى معدل العيش عندنا طاح قال ليك الدولة حاميانا عملت للفقراء صندوق الموازنة خير بلادنا كثير زادونا في التعليم تربية المواطنة زادوا للمرا شلا تحرير او صلحوا لها المدونة فرشوها او غطاوها بالحرير او المسكين ما خلاو لو لا مانطة لا لعبانة المانضة هي هي و الزيادة في الصير شكوانا ليك يا مولانا راه 200 درهم غير ضوء 60 منها ضرائيب كون تشوفوا المانضة شحال تقولوا آش هذ الغرائيب لفقير اليوم حالو مال و تسألو يقول ليك مكاتيب عايش على عصيد النخال و على ملاقات الله راه رقيب ما يشد في قلبو كيف الغربال و شحال صابر على هذ التعذيب الحرفي فراقو عليه موحال و اللحم و الديسير صبح عليه غريب كلشي صبح عندنا بي المال هذا حالنا في ارض المغريب شكون اللي باقي يسول و يسال ايلا ما كنتي تجي عندو او تجيب مات الحق او ماتوا لرجال و المنكر اليوم ما بقا علينا يغيب تشوف بنادم و تقول غزال تعطيه بالظهر يصبح ذيب على هذ الوضع شحال كتبت من مقال و شكون من غيرك يا ربي لينا حبيب يا ربي غير هذ الوضع قبل لا عظمنا يدبال ما كاين غيرك نسألو و يكون قريب رحال اودغوغ